«Հանրահավաքներ կանցկացվեն Թուրքիայի բոլոր նահանգներում»․ Օզել

Թուրքիայում ընդդիմությունն ամեն շաբաթ և կիրակի հանրահավաքներ է անցկացնելու 81 նահանգներից մեկում, իսկ ամեն չորեքշաբթի՝ Ստամբուլում։ Այս մասին հայտարարել է գլխավոր ընդդիմադիր Ժողովրդահանրապետական ​​կուսակցության առաջնորդ Օզգյուր Օզելը։

«Այսօր 2,2 միլիոն մարդ հավաքվեց Ստամբուլի Մալթեփե հրապարակում: Ցանկանում եմ շնորհակալություն հայտնել մեր բոլոր քաղաքացիներին, ովքեր «լցրեցին» հրապարակը՝ պաշտպանելու արդարությունը: Սա դեռ սկիզբն է: Այժմ մենք ամեն շաբաթ և կիրակի հանրահավաքներ ենք անցկացնելու նահանգներում (ամեն անգամ՝ 81 նահանգներից մեկում) և ամեն չորեքշաբթի՝ Ստամբուլի թաղամասերից մեկում»,- քաղաքական գործչի խոսքերն է մեջբերում Halk TV-ն:

Հիշեցնենք, որ մարտի 19-ին Ստամբուլի ընդդիմադիր քաղաքապետ Էքրեմ Իմամօղլուի ձերբակալությունից հետո (կոռուպցիայի և ահաբեկիչների հետ կապերի մեղադրանքով) Թուրքիայում բողոքի ալիք բարձրացավ։

Ամենամեծ ցույցերը կազմակերպվել են Ստամբուլում, Անկարայում և Իզմիրում, որոնք հաճախ ուղեկցվել են ոստիկանության հետ բախումներով։