Հարավային Կորեայի ՍԴ-ն հաստատել է նախագահ Յուն Սոկ Յոլի իմպիչմենթը

Հարավային Կորեայի Սահմանադրական դատարանը հաստատել է երկրի նախագահ Յուն Սոկ Յոլի իմպիչմենթը, հայտնում է РИА Новости-ն:
ՍԴ-ն միաձայն որոշում է կայացրել ընդունել երկրի խորհրդարանի միջնորդությունը՝ նախագահին իմպիչմենթի ենթարկելու վերաբերյալ, ինչը նշանակում է, որ Յուն Սոկ Յոլը վերջնականապես կհեռացվի պաշտոնից։

Հարավային Կորեայում այժմ սպասվում են արտահերթ ընտրություններ։ Նոր նախագահը պետք է ընտրվի 60 օրվա ընթացքում, այսինքն՝ մինչև հունիսի 3-ը: Մինչ այդ վարչապետ Հան Դոկ-Սուն կշարունակի պաշտոնավարել՝ որպես պետության ղեկավար:

Հարավային Կորեայի իշխող «Քաղաքացիական ուժ» կուսակցությունը ՍԴ որոշումից հետո ներողություն է խնդրել քաղաքացիներից և կոչ արել միասնություն ցուցաբերել, հաղորդում է Yonhap գործակալությունը:

Հիշեցնենք՝ ընդդիմադիր խմբակցությունների ներկայացուցիչները խորհրդարան էին ներկայացրել բանաձև՝ նախագահին մեղադրելով իշխանությունը բռնությամբ զավթելու և պաշտոնական լիազորությունները չարաշահելու մեջ։