«Ռուսաստանը խոսում է խաղաղությունից ու սպանում». Մակրոն

Ֆրանսիայի նախագահ Էմանուել Մակրոնը հայտարարել է, որ Ռուսաստանն ուկրաինական քաղաքների վրա իր հարձակումներով արհամարհում է հրադադարի առաջարկները և շարունակում է սպանել խաղաղ բնակիչներին։

Նրա խոսքով՝ ապրիլի 6-ի գիշերը ռուսական ուժերը կրկին բազմաթիվ հարվածներ են հասցրել Ուկրաինային՝ Կրիվոյ Ռոգի վրա հարձակումից երկու օր անց, որի հետևանքով զոհվել է 20 մարդ, այդ թվում՝ 9 երեխա։
Ֆրանսիայի ղեկավարը ցավակցություն է հայտնել Ուկրաինայում համազգային սգո օրվա կապակցությամբ և ընդգծել, որ իր մտքերը երեխաների և հրետակոծության մյուս զոհերի հետ են։

Մակրոնը հիշեցրել է, որ Ուկրաինան պատրաստակամություն է հայտնել միանալու ԱՄՆ-ի նախագահ Դոնալդ Թրամփի առաջարկած 30-օրյա հրադադարին, սակայն Ռուսաստանը նույն ինտենսիվությամբ շարունակում է ռազմական գործողությունները և անտեսում խաղաղ բնակչության տառապանքը։

«Ռուսական այս հարձակումները պետք է ավարտվեն: Հրադադարի անհրաժեշտություն կա, որքան հնարավոր է՝ շուտ: Եթե Ռուսաստանը շարունակի ձգձգել և հրաժարվել զինադադարից, անհրաժեշտ կլինեն վճռական գործողություններ,- ընդգծել է նա:- Որքա՞ն երկար է Ռուսաստանը ծաղրելու խաղաղության առաջարկները՝ շարունակելով սպանել երեխաներին և այլ քաղաքացիական անձանց»:

Ըստ վերջին տվյալների՝ ապրիլի 4-ին Կրիվոյ Ռոգում տեղի ունեցած հարձակումների հետևանքով զոհվել է 20 մարդ, որից 9-ը երեխաներ են եղել, ևս 75 մարդ վիրավորվել է։