«Ռուսաստանը պետք է տանգո պարի Ուկրաինայի հետ»․ Ռյուտե

519

Երկուշաբթի, 07 ապրիլի, 2025 թ., 10:15

Հակամարտության լուծման համար Ռուսաստանը նույնպես պետք է «տանգո պարի» Ուկրաինայի հետ, բայց, ըստ երևույթին, դեռ չի անում դա, CBS-ին տված հարցազրույցում ասել է ՆԱՏՕ-ի գլխավոր քարտուղար Մարկ Ռյուտեն։

«Գնդակն ակնհայտորեն ռուսների դաշտում է»,- ասել է Ռյուտեն:

Նրա խոսքով՝ ԱՄՆ նախագահի թիմը փորձում է հասնել այնպիսի իրավիճակի, որ հնարավոր լինի դադարեցնել հակամարտությունը, սակայն առանց Ռուսաստանի օգնության դա դժվար կլինի։

«Ճակատային գիծը սխալ ուղղությամբ է տեղաշարժվում, այս պատերազմը սխալ ուղղությամբ է ընթանում»,- նշել է Ռյուտեն:

Տանգոյի համար կողմերի մասնակցության անհրաժեշտության մասին նույն արտահայտությունն օգտագործել էր նաև ԱՄՆ նախագահ Դոնալդ Թրամփը՝ մարտի կեսերին խաղաղ գործընթացը նկարագրելու համար, երբ ամերիկյան և ուկրաինական պատվիրակություններին հաջողվեց նախնական պայմանավորվածության գալ 30-օրյա զինադադարի շուրջ։ Թրամփը հույս էր հայտնել, որ Ռուսաստանը հավանություն կտա այս նախաձեռնությանը։