«ԱՄՆ-ն և Իրանն ուղիղ բանակցություններ են վարում». Թրամփ

Վաշինգթոնն ու Թեհրանն ուղիղ խորհրդակցությունների մեջ են, և ԱՄՆ-ն կնախընտրի Իրանի միջուկային զարգացումների հարցը լուծել բանակցությունների միջոցով։ Այս մասին հայտարարել է ամերիկացի առաջնորդ Դոնալդ Թրամփը։
«Մենք ուղիղ բանակցություններ ենք վարում Իրանի հետ։ Դրանք սկսվել են։ Դրանք կշարունակվեն շաբաթ օրը։ Մենք շատ կարևոր հանդիպում կունենանք։ Կտեսնենք, թե ինչ կլինի»,- ասել է նախագահը Սպիտակ տանը Իսրայելի վարչապետ Բենիամին Նեթանյահուի հետ հանդիպումից հետո պատասխանելով լրագրողների հարցերին։

«Կարծում եմ՝ բոլորը համաձայն են, որ գործարքի հասնելը նախընտրելի է, քան ակնհայտ բաներ անելը»,- ասել է նա՝ չբացատրելով, թե ինչ նկատի ուներ ակնհայտ ասելով։ Ամերիկացի առաջնորդն ավելի վաղ չէր բացառել, որ ԱՄՆ-ն ուժ կկիրառի Իրանի դեմ։ «Եվ ես չեմ ուզում այդ ակնհայտի մեջ թաթախվել: Անկեղծ ասած, դա նաև այն չէ, որի մեջ ցանկանում է թաթախվել Իսրայելը, եթե կարելի է խուսափել դրանից»,- հավելել է Թրամփը: Նրա խոսքով՝ իրադարձությունների նման զարգացումից խուսափելը «բխում է Իրանի շահերից»։