«Գազայի հատվածում ամերիկյան խաղաղապահ ուժեր կարող են լինել»․ Թրամփ

Գազայի հատվածն «անչափ կարևոր անշարժ գույք է» և այն պետք է վերածվի խաղաղ և ազատ տարածքի, հայտարարել է ԱՄՆ նախագահ Դոնալդ Թրամփը՝ Իսրայելի վարչապետ Բենիամին Նեթանյահուի հետ համատեղ ասուլիսում։

«Կարծում եմ՝ մենք կներգրավվենք այդ գործընթացում: Լավ կլիներ այնտեղ ունենալ խաղաղապահ ուժեր, ինչպես օրինակ՝ ամերիկյան, վերահսկել Գազայի հատվածը և տնօրինել այն»,- ասել է ԱՄՆ նախագահը:

Թրամփը Գազայի հատվածն անվանել է «հիանալի վայր, որտեղ ոչ ոք չի ցանկանում ապրել» և նշել, որ Իսրայելը «Գազայի հատվածը տվել է» խաղաղության դիմաց, ինչը, սակայն, տեղի չի ունեցել։

Թրամփը ևս մեկ անգամ առաջարկել է վերաբնակեցնել Գազայի հատվածի բնակչությանը՝ հայտարարելով, որ «շատ երկրներ» պատրաստ են ընդունել անկլավի բնակիչներին։ Նեթանյահուն պաշտպանել է նրա առաջարկը։ Նրա կարծիքով՝ խոսքը «մարդկանց ընտրության հնարավորություն տալու մասին է»։

«Ցանկացած այլ վայրում, ներառյալ պատերազմական գոտիները (Ուկրաինա, Սիրիա), մարդիկ կարող էին հեռանալ: Գազայի հատվածը միակ վայրն էր, որտեղ բնակչությունը փակված էր: Ի՞նչ վատ բան կա, եթե մարդկանց ընտրություն տանք»,- ասել է Նեթանյահուն:

Իսրայելի վարչապետի խոսքով՝ ինքը և Թրամփը քննարկել են այն հնարավոր երկրների ցանկը, որտեղ Գազայի պաղեստինցիները կարող են տեղափոխվել։