«Ուկրաինան երրորդ կարգի երկիր չէ». Զելենսկին հակադարձել է Բեսենթին

Օգտակար հանածոների վերաբերյալ ԱՄՆ-ի հետ համաձայնագրի շուրջ տեխնիկական բանակցությունները կկայանան Վաշինգթոնում՝ ապրիլի 11-12-ը։ Այս մասին, ինչպես հաղորդում է UNIAN-ը, հայտարարել է Ուկրաինայի նախագահ Վլադիմիր Զելենսկին։

Նրա խոսքով՝ օգտակար հանածոների զարգացման համար ԱՄՆ-ի առաջարկած հիմնադրամի ստեղծման և միջոցների տնօրինման հարցում Ուկրաինան պաշտպանելու է հավասարության սկզբունքը։

Զելենսկին անդրադարձել է ԱՄՆ ֆինանսների նախարար Սքոթ Բեսենթի հայտարարությանը, թե Ուկրաինան պետք է մինչ իր (Զելենսկու) այցը Սպիտակ տուն ստորագրեր հանքանյութերի վերաբերյալ համաձայնագիրը։

«Այն դեպքում, երբ մատնացույց էր արվում պայմանագիրն ու ասվում, որ հիմա այն պետք է ստորագրվի, ես միայն կարող էի պատասխանել՝ վերջ տվեք մատնացույց անել և եկեք առարկայական շփում սկսենք։ Հավանաբար նա այլ ձևաչափի երկխոսություն էր ակնկալում, բայց ես Ուկրաինան երրորդ կարգի երկիր չեմ համարում։ Մենք պետք է շփվենք հավասարության սկզբունքով»,- նշել է Զելենսկին։

Հիշեցնենք՝ ԱՄՆ ֆինանսների նախարար Սքոթ Բեսենթն ավելի վաղ հայտարարել էր, որ Ուկրաինան տապալել է հանքանյութերի վերաբերյալ աշխարհի ամենապարզ գործարքը։