«Արաղչին և Ուիթքոֆը պայմանավորվել են բանակցությունները շարունակել մեկ շաբաթ հետո»․ Իրանի ԱԳՆ

Իրանի արտաքին գործերի նախարար Աբբաս Արաղչին և Մերձավոր Արևելքի հարցերով ԱՄՆ հատուկ բանագնաց Սթիվ Ուիթքոֆը պայմանավորվել են մեկ շաբաթ հետո շարունակել բանակցությունները երկու կողմերի միջև․ ասվում է Իրանի ԱԳՆ հայտարարության մեջ։
Ավելի վաղ Օմանի մայրաքաղաք Մուսկատում անուղղակի բանակցություններ են տեղի ունեցել Իրանի արտգործնախարար Աբբաս Արաղչիի և Մերձավոր Արևելքի հարցերով ԱՄՆ նախագահի հատուկ բանագնաց Սթիվ Ուիթքոֆի միջև։

«Կողմերը պայմանավորվել են, որ բանակցությունները կշարունակվեն մեկ շաբաթ հետո: Օմանի միջնորդությամբ անցկացվող բանակցությունների ընթացքում Իրանի արտգործնախարար Արաղչին և Մերձավոր Արևելքի հարցերով ԱՄՆ նախագահի հատուկ բանագնաց Սթիվ Ուիթքոֆն Օմանի արտգործնախարարի միջոցով փոխանակել են իրենց կառավարությունների դիրքորոշումները՝ Իրանի խաղաղ միջուկային ծրագրի և Իրանի դեմ պատժամիջոցների վերացման հետ կապված հարցերի վերաբերյալ»,- ասվում է Իրանի ԱԳՆ թելեգրամ ալիքում հրապարակված հայտարարության մեջ։

Նշվում է նաև, որ ավելի քան երկուսուկես ժամ տևած բանակցությունների ավարտից հետո իրանական և ամերիկյան պատվիրակությունների ղեկավարները մի քանի րոպե երկխոսություն են ունեցել Օմանի արտգործնախարարի ներկայությամբ։