Եմենում ԱՄՆ հարվածների հետևանքով 6 մարդ է զոհվել

1887

Երկուշաբթի, 14 ապրիլի, 2025 թ., 10:21

Եմենում ԱՄՆ ավիահարվածների հետևանքով զոհերի թիվը հասել է վեցի, հայտնել է հութիների վերահսկողության տակ գտնվող շրջանի առողջապահության նախարարության խոսնակ Անիս ալ Ասբահին։

«Բանի Մաթար շրջանում «Աս-Սուվարի» գործարանի վրա ամերիկյան հարձակման հետևանքով զոհված և վիրավորված խաղաղ բնակիչների թիվը հասել է 26-ի, որոնցից վեցը զոհվել են, 20-ը՝ վիրավորվել»,- գրել է նա՝ X սոցիալական ցանցում։

Ավելի վաղ հութիների «Ալ Մասիրա» հեռուստաալիքը հայտնել էր, որ ամերիկյան ինքնաթիռը հարվածել է Եմենի Սանա նահանգում գտնվող կերամիկայի գործարանին։ Հեռուստաալիքը հաղորդել էր հինգ զոհի մասին, իսկ Եմենի առողջապահության նախարարությունը հայտնել էր տասը վիրավորի մասին: