«Իրան-ԱՄՆ բանակցությունները կշարունակվեն անուղղակի ձևաչափով»․ Բաղայի

Իրանի ԱԳՆ խոսնակ Էսմայիլ Բաղային մանրամասներ է հայտնել Թեհրանի և Վաշինգթոնի միջև բանակցությունների հաջորդ փուլի վերաբերյալ։

Անդրադառնալով բանակցությունների երկրորդ փուլի անցկացման վայրին՝ բարձրաստիճան դիվանագետը նշել է, որ ոչ թե բանակցությունների վայրն է կարևոր, այլ՝ ձևաչափը։

«Իհարկե, բանակցությունների վայրը գլխավոր հարցը չէ, կարևորն Իրանի և ԱՄՆ-ի փոխգործակցության ձևի և շրջանակի շարունակությունն է։ Այն կշարունակի մնալ անուղղակի՝ Օմանի միջնորդությամբ։

Մենք մշտական ​​կապի մեջ ենք օմանական կողմի հետ, և նրանց մեկնաբանությունները պաշտոնապես ստանալուց հետո, վերջնական որոշում կկայացվի բանակցությունների վայրի վերաբերյալ»,- ասել է Բաղային։

Ավելի վաղ հաղորդվել էր, որ Իրան-ԱՄՆ բանակցությունների հաջորդ փուլը նախատեսվում է շաբաթ օրը՝ Հռոմում։ Ամերիկյան կողմը ցանկություն էր հայտնել բանակցությունները շարունակել ուղղակի ձևաչափով։