«ԱՄՆ-Իրան բանակցություններին կքննարկվի միջուկային զինանոցի վերահսկումը»․ Ուիթքոֆ

ԱՄՆ-ի և Իրանի միջև բանակցությունների հիմնական թեմաները կլինեն Թեհրանում ուրանի հարստացման մակարդակի սահմանափակումները, ինչպես նաև սպառազինությունների, այդ թվում՝ հրթիռների վերահսկումը։ Այս մասին հայտարարել է ԱՄՆ նախագահի հատուկ բանագնաց Սթիվ Ուիթքոֆը։

«Իրանցիների հետ բանակցությունները կկենտրոնանան երկու հիմնական կետերի շուրջ»,- ասել է նա Fox News-ին։ «Առաջինը հարստացումն է․ նրանց 3,67 տոկոսից բարձր հարստացում պետք չէ, երկրորդը սպառազինության վերահսկման մեխանիզմներն են, ներառյալ այն հրթիռների, որոնք կուտակել են»:

Ուիթքոֆի խոսքով՝ ստուգման խիստ մեխանիզմներ են պետք, որոնք վերջին մի քանի տարիների ընթացքում բացակայում էին:

«Դա հիմք կհանդիսանա դրական բանակցությունների համար։ Եթե այս առումով փոփոխություն չլինի, մենք պետք է այլընտրանք փնտրենք, որը ոչ մեկին ձեռնտու չէ»,- նշել է Ուիթքոֆը։

Հիշեցնենք՝ ապրիլի 12-ին Իրանի միջուկային ծրագրի շուրջ Օմանում անուղղակի բանակցություններ են տեղի ունեցել Թեհրանի և Վաշինգթոնի միջև։

Իրանի ԱԳՆ-ն հայտնել է, որ բանակցությունների հաջորդ փուլը տեղի կունենա Մուսկատում՝ ապրիլի 19-ին։