«Թրամփի մերձավոր շրջապատը հորդորում է ավելի կոշտ լինել Պուտինի հանդեպ»․ #WSJ

ԱՄՆ-ի նախագահ Դոնալդ Թրամփի շրջապատի մի քանի բարձրաստիճան պաշտոնյաներ նրան խորհուրդ են տվել առավել թերահավատորեն վերաբերվել Ուկրաինայի հետ խաղաղության ցանկության մասին Մոսկվայի հայտարարություններին, գրում է Wall Street Journal-ը։

Ըստ լրատվամիջոցի աղբյուրների՝ ի թիվս այլոց, նման խորհուրդներ են տվել պետքարտուղար Մարկո Ռուբիոն և Ուկրաինայի հարցով հատուկ բանագնաց Քիթ Քելլոգը։ Քելլոգը կիրակի կարծիք էր հայտնել, որ Սումիի վրա Ռուսաստանի հարձակումն «անցել է պարկեշտության բոլոր սահմանները», Ռուբիոն այն անվանել էր «սարսափելի»:

Լրատվամիջոցը հայտնում է, որ պաշտոնյաները Թրամփին խորհուրդ են տալիս ավելի զգույշ լինել ՌԴ նախագահ Վլադիմիր Պուտինի հետ և ավելի կոշտ դիրքորոշում ցուցաբերել նրա հանդեպ, երբ խոսքը վերաբերում է Կիևից տարածքային զիջումների վերաբերյալ Մոսկվայի պահանջներին։

Հաղորդվում է նաև, որ ԱՄՆ-ի պետքարտուղարությունն ու ֆինանսների նախարարությունն ուսումնասիրում են հակառուսական պատժամիջոցների խստացման տարբերակներ։

Սակայն Թրամփը, գրում է WSJ-ն, կիսում է իր հատուկ բանագնաց Սթիվ Ուիթքոֆի կարծիքը։ Պուտինի հետ երկու հանդիպումից հետո Ուիթքոֆը կարծում է, որ Ռուսաստանի նախագահը ցանկանում է խաղաղություն Ուկրաինայում: