«Կցանկանայի դառնալ խաղաղության դեսպան»․ Վան Դամը՝ Պուտինին

Հոլիվուդյան աստղ Ժան-Կլոդ Վան Դամը տեսաուղերձ է հղել ՌԴ նախագահ Վլադիմիր Պուտինին՝ ցանկություն հայտնելով գալ Ռուսաստան և դառնալ «խաղաղության դեսպան»։

Տեսանյութը հրապարակվել է ուկրաինացի լրագրող Դիանա Պանչենկոյի Telegram ալիքում։

«Մենք ցանկանում ենք գալ Ռուսաստան: Կփորձենք դա անել այնպես, ինչպես դուք եք ցանկանում, որպեսզի հնարավորություն ունենամ դառնալ խաղաղության դեսպան: Ինձ համար պատիվ կլիներ կրել այդ կոչումը», - ասել է Վան Դամը:

Դերասանը նշել է, որ մտադիր չէ քաղաքական թեմաներ շոշափել, այլ ցանկանում է խոսել բացառապես «խաղաղության, սպորտի և երջանկության մասին»։

Ուղերձի վերջում Վան Դամը «մեծ համբույր» է փոխանցել Պուտինին, նրա ընտանիքին և ողջ ռուս ժողովրդին։

Հրապարակված տեսանյութում դերասանի կողքին նստած տղամարդը, ըստ լրատվամիջոցների, ձեռնարկատեր և Ուկրաինայի նախկին պատգամավոր Ալեքսանդր Օնիշչենկոն է։