«Մոսկվան պատրաստ է միջնորդ լինել Իրան-ԱՄՆ բանակցություններում»․ Լավրով

Ռուսաստանը պատրաստ է հանդես գալ որպես միջնորդ Իրանի և ԱՄՆ-ի միջև իրանական միջուկային ծրագրի շուրջ բանակցություններում, եթե կողմերը նման հետաքրքրություն ցուցաբերեն։ Այս մասին հայտարարել է ՌԴ ԱԳ նախարար Սերգեյ Լավրովը։

«Մենք ողջունում ենք Իրանի և ԱՄՆ-ի ցանկությունը՝ հասնել իրանական միջուկային ծրագրի շուրջ օբյեկտիվ պայմանավորվածությունների: Ռուսաստանը պատրաստ է անհրաժեշտության դեպքում նպաստել Իրանի և ԱՄՆ-ի միջև բանակցային գործընթացին», - ասել է Լավրովը՝ Իրանի արտգործնախարար Աբբաս Արաղչիի հետ բանակցությունների արդյունքներով համատեղ մամուլի ասուլիսում։

Լավրովը նաև ընդգծել է, որ միջուկային գործարքը քննարկելիս պետք է հաշվի առնել Թեհրանի օրինական շահերը։

«Մոսկվան պատրաստ է նպաստել միջուկային համաձայնագրի շուրջ Վաշինգթոնի և Թեհրանի միջև հնարավոր համաձայնություններին, եթե դրանցում հաշվի առնվեն Իրանի շահերը», ասել է Լավրովը։