Մեկ ամիս անց Իսրայելի բանակն ընդունել է իր սխալը

Իսրայելական բանակը, Գազայի հատվածում 15 պաղեստինցի փրկարարների սպանությունից մոտ մեկ ամիս անց ընդունել է միջադեպին մասնակից իր զինվորների սխալը: Շտապօգնության մեքենաների և հրշեջ մեքենաների վրա կրակոցները տեղի են ունեցել «օպերատիվ թյուրիմացության» հետևանքով, ասվում է Իսրայելի պաշտպանության բանակի այսօրվա ամփոփագրում:
Մարտի 23-ին Ռաֆահում 3 անընդմեջ զինված միջադեպ է տեղի ունեցել, և փրկարարների մասնակցությամբ միջադեպը երկրորդն է եղել, ասվում է զեկույցում։ Հետաքննությունը պարզել է, որ առաջին երկու իրավիճակներում հրազենի կիրառումը «(իսրայելական-խմբ.) զորքերի օպերատիվ թյուրիմացության արդյունք է եղել», ասվում է զեկույցում։ Իսրայելի պաշտպանության բանակի զորքերը կարծել են, թե իրենք բախվել են «հակառակորդի ուժերի կողմից կրիտիկական սպառնալիքի»:
Հետաքննությունը նաև հայտնաբերել է «մի շարք մասնագիտական ​​սխալներ, հրամանների խախտումներ և միջադեպի մասին թերի հաշվետվություն»,- խոստովանել է Իսրայելի պաշտպանության բանակը: Հետաքննությունից հետո աշխատանքից կազատվի գումարտակի հրամանատարի տեղակալն, ով ղեկավարել է գործողությունը միջադեպի ժամանակ և ով ներկայացրել է կատարվածի «թերի և ոչ ճշգրիտ հաղորդում»։ Նրա վերադասը՝ բրիգադի հրամանատարը, կստանա նկատողություն, որը կմտցվի նրա անձնական գործում։

«Իսրայելի պաշտպանության բանակն ափսոսում է չներգրավված քաղաքացիական անձանց պատճառված ցանկացած վնասի համար»,- ասվում է հայտարարության մեջ: