«ԱՄՆ-ն կարծում է, որ Ուկրաինան պատրաստ է դե ֆակտո զիջել որոշ տարածքներ»․ #NYP

ԱՄՆ-ի նախագահ Դոնալդ Թրամփի՝ Ուկրաինայում հակամարտության կարգավորման պլանը նախատեսում է հրադադարից հետո եվրոպական զորքերի տեղակայում։ Այս մասին հայտնում է New York Post-ը (NYP)՝ վկայակոչելով ամերիկյան վարչակազմի բարձրաստիճան ներկայացուցչին։

Լրատվամիջոցի աղբյուրի համաձայն, ուկրաինական կողմը, կարծես թե, «պատրաստ է դե ֆակտո զիջել տարածքների 20%-ը, բայց՝ ոչ դե յուրե»։

«Թրամփի ծրագիրը կարող է ներառել Ուկրաինայում եվրոպական զորքերի տեղակայում, եթե հրադադարի մասին համաձայնություն ձեռք բերվի։ Խնդիրն այն է, թե ինչպես կներկայացվեն անվտանգության ուժերը. մենք դա անվանում ենք «դիմակայության ուժեր»։ Սա անվտանգության երաշխիքների մի մասն է, որը ցանկանում են ուկրաինացիները, և հուսով ենք՝ նրանք կստանան դա»,- հայտնել է աղբյուրը։

Քննարկվում է նաև հրադադարը վերահսկելու համար առանձին խաղաղապահ ուժեր ստեղծելու հնարավորությունը՝ «համատեղ հանձնաժողովի» տեսքով, որում ներգրավված կլինեն «ռուսներ, ուկրաինացիներ և ՆԱՏՕ-ի անդամ չհանդիսացող երրորդ երկրի ներկայացուցիչներ», գրում է NYP-ն՝ հավելելով, որ Միացյալ Նահանգները նույնպես կարող է ներգրավվել առաքելությանը, բայց՝ ոչ որպես «տեղում գտնվող ռազմական ուժ»: Վաշինգթոնը, ըստ աղբյուրի, կներկայացվի որպես «դրամական ուժ՝ երրորդ կողմի հետ միասին»: