«Քաղաքացիական օբյեկտներին չհարվածելու կոնկրետ պայմանավորվածություններ չկան»․ Պեսկով

Մոսկվայի և Կիևի միջև բանակցություններից առաջ անհրաժեշտ է «իրավաբանորեն մաքրել խոչընդոտները», լրագրողներին հայտնել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով նախագահ Պուտինի՝ «քաղաքացիական ենթակառուցվածքի օբյեկտներին հարվածներ չհասցնելու»՝ Զելենսկու առաջարկը քննարկելու մասին հայտարարությունը։

Ապրիլի 20-ին Ուկրաինայի նախագահ Վլադիմիր Զելենսկին, ի պատասխան Ռուսաստանի կողմից հայտարարված Զատկի զինադադարի, առաջարկել էր ձեռնպահ մնալ «քաղաքացիական ենթակառուցվածքների վրա հեռահար անօդաչու թռչող սարքերով և հրթիռներով ցանկացած հարվածից»։

Պուտինը հայտնել էր, որ այս նախաձեռնությունը պետք է քննարկվի, հնարավոր է, «երկկողմ ձևաչափով՝ երկխոսության արդյունքում»։

Ի պատասխան հարցին, թե ինչպե՞ս կարող են Մոսկվան և Կիևը երկխոսություն վարել, եթե Ռուսաստանը բազմիցս նշել է, որ Ուկրաինայում բանակցությունները պաշտոնապես արգելված են, Պեսկովը պատասխանել է․

«Եթե ուկրաինական կողմը բաց է այս հարցում, հավանաբար, պետք է որոշ քայլեր ձեռնարկվեն՝ իրավաբանորեն վերացնելու այդ խոչընդոտներն այդպիսի շփումների ճանապարհին»։

Պեսկովը նշել է, որ դեռևս կոնկրետ պլաններ չկան քաղաքացիական օբյեկտներին ուղղված հրադադարի շուրջ բանակցությունների համար։

«Նախ, դա պետք է քննարկվի, և նախագահ Պուտինն ասել է, որ պատրաստ է քննարկել», - հավելել է Պեսկովը։