«ՌԴ-ի դեմ պատժամիջոցները չեղարկելու՝ Politico-ի լուրերը կեղծ են»․ Ռուբիո

ԱՄՆ Պետքարտուղար Մարկո Ռուբիոն հերքել է Politico ամսագրի տարածած լուրերն այն մասին, որ Սպիտակ տունը քննարկում է Ռուսաստանի դեմ էներգետիկ պատժամիջոցները չեղարկելու հնարավորությունը՝ Ուկրաինայում հակամարտության խաղաղ կարգավորման շրջանակներում։ Այս մասին Ռուբիոն գրառում է կատարել X-ում.

«Սա միանշանակ սուտ է: Ո՛չ Սթիվ Ուիթքոֆը, ո՛չ ես որևէ խոսակցություն չենք ունեցել Ուկրաինայի հետ համաձայնագրի շրջանակներում Ռուսաստանի դեմ պատժամիջոցները չեղարկելու մասին: Սա լրագրության չարաշահում է: Եթե Politico-ն ազնվություն ունենա, կհերքի այդ հերյուրանքը»,- գրել է Ռուբիոն:

Ըստ Politico-ի, նախագահի աշխատակազմը քննարկել էր «Հյուսիսային հոսք 2» գազատարի և Եվրոպայում ռուսական այլ նախագծերի նկատմամբ պատժամիջոցների վերացման հարցը, որի գլխավոր ջատագովն ԱՄՆ հատուկ ներկայացուցիչ Սթիվ Ուիթքոֆն է։ Լրատվամիջոցը գրել էր, որ Ուիթքոֆն իր ենթականերին հանձնարարել է կազմել էներգետիկ ոլորտում ՌԴ-ի դեմ ամերիկյան բոլոր պատժամիջոցների ցանկը։