«Ուկրաինացիների համբերության բաժակը կարող է լցվել»․ Զելենսկի

Ռուսաստանը պետք է դադարեցնի Ուկրաինայի հրթիռակոծումը, ինչը ցույց կտա հրադադար հաստատելու՝ նրա ցանկությունը։ Այս մասին հայտարարել է Ուկրաինայի նախագահ Վլադիմիր Զելենսկին՝ Հարավային Աֆրիկայի նախագահ Սիրիլ Ռամաֆոսայի հետ համատեղ մամուլի ասուլիսում։

Նա նշել է, որ եթե Ռուսաստանը հայտարարի, որ պատրաստ է հրադադարի, ապա պետք է դադարեցնի զանգվածային հարվածներն Ուկրաինային։ Նրա խոսքով, ուկրաինացիների համբերության բաժակը կարող է լցվել։ Զելենսկին ընդգծել է, որ հենց ուկրաինացիներն են ենթարկվում ռուսական հրթիռների հարձակմանը։

«Ուկրաինացիների համբերության բաժակը կարող է լցվել։ Հասկանո՞ւմ եք, որովհետև մենք ենք հարձակման ենթարկվում, և ոչ այլ ոք։ Ես դա ոչ մեկին չէի ցանկանա, բայց մենք ռուսական հրթիռների հարվածի տակ ենք»,- նշել է Ուկրաինայի նախագահը։

Ապրիլի 24-ին պաշտոնական այցով Հարավային Աֆրիկայում գտնվող Զելենսկին հայտարարել է, որ չեղարկել է իր հանդիպումների մի մասը Հարավային Աֆրիկայում՝ գիշերը Ռուսաստանի կողմից Կիևի վրա հարձակումների պատճառով։

Զելենսկին նշել է, որ կան բազմաթիվ ավերածություններ, զոհեր և վիրավորներ խաղաղ բնակչության շրջանում։