«ԵՄ-ն գերադասել է ավելորդ սրացում չառաջացնել Թուրքիայի հետ»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Հայաստանում ԵՄ դիտորդական առաքելությունից կարծես թե առայժմ չկա որևէ արձագանք այն «խմբագրման» կապակցությամբ, որ նրանք արել էին Իքսում իրենց գրառման կապակցությամբ: Ինչո՞ւ է «հայոց ցեղասպանություն» արտահայտությունը փոխվել «1915-23 թվականների զոհեր»:

Այստեղ կա մի էական նրբերանգ: Եթե Եվրախորհրդարանը, ԵՄ առաջատար երկրները ճանաչած չլինեին հայերի ցեղասպանությունը, ինչ որ իմաստով հասկանալի կլիներ, կամ պատկերացնելի, որ նախ գրել են «ցեղասպանություն», հետո գրառումը համապատասխանեցրել են քաղաքականությանը:

Մյուս կողմից, այստեղ ըստ էության հենց դա էլ տեղի է ունեցել: Այսօր քաղաքականությունն այնպիսինն է, որ ԵՄ-ն ունի Թուրքիայի կարիքը, գուցե առավել, քան երբևէ: Հետևաբար, գերադասել են Հայաստանում ԵՄ դիտորդական առաքելության գրառումով չառաջացնել ավելորդ սրացում:

Սա ցուցիչ է, թե գործնականում ինչպես են աշխատում հարաբերությունները, և ըստ այդմ՝ որքան անիրատեսական են եզրահանգումները, թե Եվրամիությունը կարող է լինել Հայաստանի անվտանգության երաշխավոր:

Մի քանի օր առաջ ես մեկ այլ գրառում էի արել, ԱՄՆ այն հայտարարության կապակցությամբ, որ Նահանգները այլևս չի կարող լինել Եվրոպայի անվտանգության միակ երաշխավոր: Եթե Նահանգները չի կարող լինել Եվրոպայի անվտանգության միակ երաշխավոր, ապա Եվրոպան ինքը չի կարող անվտանգության երաշխավոր լինել որևէ այլ ուղղության համար՝ ունենալով իր անվտանգության երաշխավորության բաց:

Իսկ այդ բացը լրացնելու համար էլ Եվրոպայի համար բարձրանում է Թուրքիայի անհրաժեշտությունը: Հարկ է գնահատել հանգիստ, առանց էմոցիաների, առանց համակրանք-հակակրանքի գերակայությունների, առանց պատրանքների: Հանգիստ, հանդարտ գնահատականները թույլ են տալիս գտնել անհրաժեշտ աշխատանքի արդյունավետ, առավել օպտիմալ, իրատեսական, և հանրայնորեն առավել հասկանալի ու ընկալելի տարբերակներն ու մոդելները»։