Իրանական նավահանգստում պայթյունի հետևանքով զոհերի թիվը հասել է 14-ի

960

Կիրակի, 27 ապրիլի, 2025 թ., 09:07

Իրանի Բանդար Աբբաս նավահանգստում տեղի ունեցած պայթյունի հետևանքով վիրավորների թիվը հասել է 750-ի,14 մարդ զոհվել է։

Tasnim-ը հայտնել էր, որ նավահանգստում վառելիքի բաք է պայթել։ Սակայն Իրանի ազգային նավթավերամշակման և բաշխման ընկերությունը հայտարարել է, որ պայթյունը կապված չէ նավթավերամշակման գործարանների, վառելիքի բաքերի, բաշխման կայանների կամ նավթատարների հետ։

Իրանի արտակարգ իրավիճակների կառավարման գործակալության խոսնակ Հոսեյն Զաֆարին ասել է, որ նախնական հետաքննությունը ցույց է տվել, որ վթարը տեղի է ունեցել դյուրավառ և քիմիական նյութեր պարունակող տարայի պայթյունի կամ հրդեհի հետևանքով։

Tasnim-ի փոխանցմամբ՝ պայթյունի ալիքն այնքան ուժեղ է եղել, որ ամբողջությամբ ոչնչացրել է մոտակայքում գտնվող վարչական շենքն ու բազմաթիվ մեքենաներ։

Նավահանգստում հրդեհը շարունակվում է։ Բանդար Աբբաս նավահանգստային քաղաքի նահանգապետ Ահմադ Պույաֆարը հայտարարել է, որ դպրոցները փակ կլինեն ապրիլի 27-ին՝ օդի աղտոտվածության պատճառով։