Իրանական և ամերիկյան կողմերի միջև բանակցությունների հինգերորդ փուլը տեղի կունենա մայիսի 23-ին

Իրանի արտաքին գործերի նախարարության խոսնակ Էսմայիլ Բաղային հաստատել է, որ Իսլամական Հանրապետության միջուկային ծրագրի շուրջ տարաձայնությունները կարգավորելու համար իրանական և ամերիկյան կողմերի միջև բանակցությունների հինգերորդ փուլը տեղի կունենա մայիսի 23-ին Հռոմում։

Բաղայիի խոսքով՝ Օմանն առաջարկել է հաջորդ փուլն անցկացնել «ուրբաթ (մայիսի 23-ին - խմբ.) Իտալիայի մայրաքաղաքում», և Իսլամական Հանրապետությունը «համաձայնվել է այս առաջարկի հետ»։ Նա հավելել է, որ իրանցի բանակցողները շարունակում են «վճռականորեն պաշտպանել Իրանի ժողովրդի իրավունքներն ու շահերը»։

Ավելի վաղ Օմանի արտաքին գործերի նախարար Բադր ալ-Բուսաիդին հայտարարել էր Իրանի և ԱՄՆ-ի միջև մայիսի 23-ին կայանալիք բանակցությունների հինգերորդ փուլի մասին։

Միացյալ Նահանգները և Իրանը Օմանի միջնորդությամբ անցկացրել են բանակցությունների չորս փուլ։ Դրանցից առաջինը տեղի է ունեցել ապրիլի 12-ին Մասկատում, երկրորդը՝ ապրիլի 19-ին Հռոմում, երրորդը և չորրորդը՝ ապրիլի 26-ին և մայիսի 11-ին՝ կրկին Օմանի մայրաքաղաքում։ Խորհրդակցություններին Իրանի պատվիրակությունը գլխավորում է արտգործնախարար Աբբաս Արաղչին, իսկ ամերիկյան պատվիրակությունը՝ նախագահի հատուկ դեսպանորդ Սթիվեն Ուիթքոֆը։