Գազայում վերջին օրերին սովից մահացել է 29 մարդ, այդ թվում` երեխաներ

1755

Հինգշաբթի, 22 մայիսի, 2025 թ., 21:37

Գազայի հատվածում վերջին օրերին սովից մահացել է 29 մարդ, այդ թվում՝ երեխաներ և տարեցներ։ Այս մասին հինգշաբթի՝ մայիսի 22-ին, հայտարարել է Պաղեստինի առողջապահության նախարար Մաջեդ Աբու Ռամադանը, հաղորդում է The New Arab-ը։

Նախարարը նշել է, որ հազարավոր մարդիկ վտանգի տակ են։

Մարդասիրական օգնությունը, ինչպես սպասվում է, կսկսի հասնել Գազայի բնակիչներին մայիսի 22-ին, այն բանից հետո, երբ Իսրայելը թույլատրեց առաջին բեռնատարների մուտքը 11 շաբաթ տևած շրջափակումից հետո։ Միևնույն ժամանակ, ինչպես նշում են պաղեստինցի պաշտոնյաները և մարդասիրական կազմակերպությունները, սա անհրաժեշտ ապրանքների ու սննդի միայն մի մասն է։

«Նյու Արաբը» գրում է, որ Գազայի քաղաքացիական պաշտպանության գործակալության տվյալներով՝ մայիսի 22-ի առավոտից ի վեր Իսրայելի հարվածների հետևանքով զոհվել է առնվազն 52 մարդ։

Իսրայելի կողմից մարտի 2-ից գործող մարդասիրական շրջափակումը դադարեցրել է սննդի, դեղորայքի և այլ ապրանքների բոլոր մատակարարումները, քանի որ Իսրայելը ճնշում է գործադրում Համասի վրա՝ համաձայնվելու հրադադարի նոր պայմաններին։

Մայիսի 18-ին Իսրայելը համաձայնեց թույլատրել մարդասիրական օգնության մուտքը Գազայի հատված՝ միջազգային կազմակերպությունների կողմից անխուսափելի սովի մասին նախազգուշացումների ֆոնին։

Մայիսի 20-ին ՄԱԿ-ի գլխավոր քարտուղարի մարդասիրական հարցերով տեղակալ Թոմ Ֆլետչերը հայտարարել է, որ Գազայի հատվածում երկու օրվա ընթացքում կարող է մահանալ 14000 նորածին, եթե նրանց ժամանակին չհասցվի մարդասիրական օգնություն։

Մայիսի 19-ին Իսրայելի բանակը հայտարարեց Գազայի հատվածում լայնածավալ ցամաքային գործողության մեկնարկի մասին և հայտնեց, որ դրա նպատակն է «գրավել օպերատիվ վերահսկողությունը ավերված պաղեստինյան տարածքների նկատմամբ»։