«Եվրոպան մտադիր է Ուկրաինայի համար զենք գնել ԱՄՆ-ից». #Bloomberg

Եվրոպական երկրները մտադիր են մեծ քանակությամբ ամերիկյան զենք գնել՝ Ուկրաինային ռազմական օգնությունը շարունակելու համար, եթե ԱՄՆ նախագահ Դոնալդ Թրամփի վարչակազմը հրաժարվի ուղղակիորեն անել դա։ Այս մասին հաղորդում է Bloomberg-ը՝ հղում անելով իր աղբյուրներին։

Եվրոպան չունի անհրաժեշտ զինանոց կամ բավարար զենք արտադրելու կարողություն՝ Կիևին մատակարարումներն ինքնուրույն շարունակելու համար՝ առանց ԱՄՆ մասնակցության։ Եվրոպական երկրները հնարավոր լուծումը տեսնում են ավելի շատ ամերիկյան զենք գնելու, այնուհետև այն Ուկրաինա ուղարկելու մեջ։

Մասնագետների գնահատմամբ՝ ԱՄՆ նախկին նախագահ Ջո Բայդենի կողմից հաստատված ռազմական օգնությունը կարող է սպառվել արդեն այս ամռանը։ Լրատվամիջոցը նշում է, որ Արևմուտքի համար դժվար կլինի լրացնել այդ բացը։