«Պուտինը լրիվ խելքը թռցրել է»․ Թրամփ

ԱՄՆ նախագահ Դոնալդ Թրամփը դժգոհություն է հայտնել Ուկրաինայում ՌԴ նախագահ Վլադիմիր Պուտինի գործողություններից և հայտարարել, որ կդիտարկի Ռուսաստանի դեմ պատժամիջոցների հնարավորությունը։

«Ես միշտ շատ լավ հարաբերություններ եմ ունեցել ՌԴ նախագահ Վլադիմիր Պուտինի հետ, բայց նրա հետ ինչ-որ բան է պատահել։ Նա լրիվ խելքը թռցրել է։ Նա անտեղի շատ մարդկանց է սպանում, և խոսքը միայն զինվորականների մասին չէ։ Հրթիռներն ու ԱԹՍ-ներն առանց որևէ պատճառի գրոհում են Ուկրաինայի քաղաքները»,- գրել է Թրամփը՝ Truth Social սոցցանցում։

Թրամփը հայտարարել է, որ եթե Պուտինը փորձի զավթել ամբողջ Ուկրաինան, «դա կհանգեցնի Ռուսաստանի փլուզմանը»։

ԱՄՆ նախագահը քննադատել է նաև Ուկրաինայի նախագահ Վլադիմիր Զելենսկուն՝ ասելով, որ իր խոսելաձևով նա «իր երկրին օգուտ չի բերում»։

«Նրա ամեն ասածը խնդիրներ է ստեղծում, ինձ դա դուր չի գալիս, և լավ կլիներ, որ դրան վերջ տրվեր։ Սա պատերազմ է, որը երբեք չէր սկսվի, եթե ես նախագահ լինեի։ Սա Զելենսկու, Պուտինի և Բայդենի պատերազմն է, այլ ոչ թե Թրամփի»,- հավելել է նա։

Ավելի վաղ հաղորդվել էր, որ Ուկրաինան ենթարկվել է հակամարտության սկզմից ի վեր ամենախոշոր օդային հարձակմանը, որի հետևանքով զոհվել է 12, վիրավորվել՝ 60 խաղաղ բնակիչ։

Զելենսկին հայտարարել էր, որ ԱՄՆ-ի լռությունը միայն խրախուսում է Պուտինին։