Մեդվեդևը Թրամփին սպառնացել է 3-րդ համաշխարհայինով, Քելոգն արձագանքել է

972

Չորեքշաբթի, 28 մայիսի, 2025 թ., 12:40

ՌԴ Անվտանգության խորհրդի փոխնախագահ Դմիտրի Մեդվեդևն արձագանքել է ԱՄՆ նախագահ Դոնալդ Թրամփի հայտարարությանը, ով ավելի վաղ քննադատել էր Վլադիմիր Պուտինին՝ ասելով, որ «նա կրակի հետ է խաղում, և Ռուսաստանի հետ շատ վատ բաներ կկատարվեն»։ Մեդվեդևը Թրամփին սպառնացել է Երրորդ համաշխարհային պատերազմով։

«Ինչ վերաբերում է Թրամփի խոսքերին, որ Պուտինը «կրակի հետ է խաղում», և «Ռուսաստանի հետ կարող են շատ վատ բաներ» պատահել, ես գիտեմ միայն մեկ ՇԱՏ ՎԱՏ բան՝ Երրորդ համաշխարհային պատերազմը։ Հուսով եմ՝ Թրամփը հասկանում է սա», - X-ում գրել է Մեդվեդևը։

Ի պատասխան՝ Ուկրաինայի հարցերով ԱՄՆ նախագահի հատուկ ներկայացուցիչ Քիթ Քելոգն ասել է, որ պատերազմի մասին վախեր սերմանելը «Մեդվեդևի կողմից անհաջող և անպատասխանատու մեկնաբանություն է, որը հարիր չէ համաշխարհային տերությանը»։

«Նախագահ Թրամփն աշխատում է դադարեցնել այս պատերազմը և վերջ դնել սպանություններին։ Մենք ակնկալում ենք ստանալ Ռուսաստանի հուշագիրը (համաձայնագրի պայմանները), որը դուք խոստացել էիք մեկ շաբաթ առաջ։ Դադարեցրե՛ք կրակը հիմա»,- ասել է Քելոգը։