Շաբաթ, 21 փետրվարի, 2026 թ.
|
Ստեփանակերտում`   +9 °C

«Զելենսկին եռակողմ հանդիպում է առաջարկել»․ #AFP

«Զելենսկին եռակողմ հանդիպում է առաջարկել»․ #AFP
954
Չորեքշաբթի, 28 մայիսի, 2025 թ., 13:46

Ուկրաինայի նախագահ Վլադիմիր Զելենսկին առաջարկել է կազմակերպել եռակողմ հանդիպում՝ իր, ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի հետ, հաղորդում է AFP-ն։

Լրատվամիջոցի փոխանցմամբ՝ Զելենսկին հաստատել է, որ պատրաստ է այդ ձևաչափով հանդիպման։ «Եթե Պուտինը անհարմար է զգում երկկողմ հանդիպումից կամ բոլորը ցանկանում են, որ հանդիպումը լինի եռակողմ, ես դեմ չեմ։ Պատրաստ եմ ցանկացած ձևաչափի»,- ասել է Զելենսկին։

Միևնույն ժամանակ, Ուկրաինայի նախագահն ԱՄՆ-ին կոչ է արել խստացնել ՌԴ-ի դեմ պատժամիջոցները։ Զելենսկու խոսքով՝ ինքն արդեն քննարկել է այս հարցը ԱՄՆ նախագահի հետ։

«Մենք նրա հետ խոսել ենք երկու հիմնական ասպեկտների՝ էներգետիկայի և բանկային համակարգի մասին։ Կկարողանա՞ ԱՄՆ-ն պատժամիջոցներ կիրառել այս երկու ոլորտների դեմ։ Ես շատ կցանկանայի դա»,- հավելել է Զելենսկին։

Նրա խոսքով՝ Ուկրաինան դեռևս Ռուսաստանից չի ստացել հակամարտության լուծման մասին հուշագիրը։

Ուկրաինան արդեն ներկայացրել է հուշագրի իր տարբերակն ԱՄՆ-ին։ Զելենսկու գրասենյակի ղեկավարի տեղակալ Իգոր Բրուսիլոն նախօրեին հայտարարել էր, որ ուկրաինական փաստաթղթում (հուշագրում) խոսվում է անվերապահ հրադադար սկսելու մասին, որը կողմերին թույլ կտա նստել բանակցությունների սեղանի շուրջ։

«Հետագա քայլերը կորոշվեն բանակցությունների ընթացքում»,- ասել էր Բրուսիլոն։

Ավելի վաղ ՌԴ ԱԳՆ խոսնակ Մարիա Զախարովան հայտարարել էր, որ ՌԴ-ն շարունակում է աշխատել հուշագրի վրա, որը կպարունակի հակամարտության կարգավորման սկզբունքներ և պայմաններ։