«Ռուսական կողմը Կիևից ստացել է հրադադարի առաջարկներ պարունակող հուշագիրը»․ Ումերով

Ռուսական կողմը Կիևից ստացել է հրադադարի առաջարկներ պարունակող հուշագիրը և այժմ պետք է ներկայացնի իր պատասխան փաստաթուղթը՝ առնվազն չորս օրվա ընթացքում։

Այս մասին հայտարարել է Ուկրաինայի պաշտպանության նախարար Ռուստեմ Ումերովը։

«Մենք հաստատում ենք Ուկրաինայի պատրաստակամությունը՝ լիակատար և անվերապահ հրադադարի և հետագա դիվանագիտական ​​աշխատանքների հարցում։ Մենք դեմ չենք ռուսների հետ հանդիպումներին և սպասում ենք նրանց հուշագրին, որպեսզի հանդիպումը դատարկ չլինի և իսկապես կարողանա մոտեցնել պատերազմի ավարտը», - Ֆեյսբուքում գրել է Ումերովը։

Ավելի վաղ ՌԴ ԱԳ նախարար Սերգեյ Լավրովը հայտնել էր, որ Ռուսաստանի և Ուկրաինայի միջև բանակցությունների 2-րդ փուլը տեղի կունենա հունիսի 2-ին՝ Ստամբուլում։ Բանակցությունների նախորդ փուլին՝ մայիսի 16-ին կողմերը պայմանավորվել էին ներկայացնել հակամարտության լուծման իրենց տեսլականը, հրադադարի առաջարկներն ու պայմանները։