«Իրանի միջուկային ծրագրի շուրջ ԱՄՆ առաջարկն անընդունելի է»․ #Reuters

740

Երկուշաբթի, 02 հունիսի, 2025 թ., 16:28

Իրանի հետ ապագա համաձայնագրի վերաբերյալ ԱՄՆ-ի գրավոր առաջարկը Թեհրանն իրականությունից կտրված է համարում, հայտնել է Reuters-ը՝ հղում կատարելով իրանական աղբյուրներից մեկին։

Ամերիկյան կողմից ներկայացված առաջարկը բացարձակապես անընդունելի է։ Թեհրանը դրանում պարունակող կետերը համարել է «միակողմանի և իրականությունից հեռու» և չի դիտարկի այն որպես հնարավոր համաձայնագրի հիմք, գրել է գործակալությունը։

Ավելի վաղ Սպիտակ տան մամուլի քարտուղար Քերոլայն Լիվիթը հայտնել էր, որ ԱՄՆ նախագահի հատուկ բանագնաց Սթիվ Ուիթքոֆն Իրանի իշխանություններին է ուղարկել Թեհրանի միջուկային ծրագրի վերաբերյալ մանրամասն և ընդունելի առաջարկ։

Իրանի ԱԳՆ պաշտոնական ներկայացուցիչ Էսմայիլ Բաղայիի խոսքով՝ ամերիկյան կողմը դեռևս երաշխիքներ չի տրամադրել Իրանին՝ Թեհրանի միջուկային ծրագրի վերաբերյալ առաջարկվող համաձայնագրի շրջանակներում հակաիրանական պատժամիջոցների վերացման վերաբերյալ, և այս առաջարկին պատասխանը կմշակվի՝ հաշվի առնելով երկրի ազգային շահերը։

Հիշեցնենք՝ Իրանի և Միացյալ Նահանգների ներկայացուցիչները մայիսի 23-ին Հռոմում անց են կացրել Թեհրանի միջուկային ծրագրի վերաբերյալ բանակցությունների հինգերորդ փուլը՝ Օմանի միջնորդությամբ: Խորհրդակցություններից հետո Օմանի արտգործնախարար Բադր ալ-Բուսաիդին հայտնել էր, որ «որոշակի, բայց ոչ վերջնական առաջընթաց» է ձեռք բերվել: