«Ֆրանսիան ԱԹՍ-ների արտադրություն կսկսի Ուկրաինայում». Լեքորնյու

Ֆրանսիական ընկերությունները մտադիր են անօդաչու թռչող սարքերի արտադրություն սկսել Ուկրաինայի տարածքում։ Այս մասին հայտարարել է Ֆրանսիայի պաշտպանության նախարար Սեբաստիան Լեքորնյուն։

«Խոսքն աննախադեպ գործընկերության մասին է. ավտոմեքենաներ արտադրող խոշոր ֆրանսիական ընկերությունը կսկսի համագործակցել պաշտպանական ոլորտում գործող ֆրանսիական փոքր ձեռնարկության հետ։ Նրանց խնդիրը կլինի ստեղծել արտադրական հզորություններ, որոնք թույլ կտան ԱԹՍ-ներ արտադրել Ուկրաինայում»,- ասել է նա՝ LCI հեռուստաալիքի եթերում։

Նախարարը չի բացահայտել ընկերությունների անունները կամ այն ​​ԱԹՍ-ների տեսակները, որոնք նախատեսվում է արտադրել։

Լեքորնյուի խոսքով՝ այս նախագծի շնորհիվ ֆրանսիական զինվորականները կստանան գործնական գիտելիքներ անօդաչու թռչող սարքերի օգտագործման վերաբերյալ։