Գերմանիայի պաշտպանության նախարարը չհայտարարված այցով Կիևում է

Գերմանիայի պաշտպանության նախարար Բորիս Պիստորիուսը չհայտարարված այցով ժամանել է Կիև։ Այս մասին, ՏԱՍՍ-ի փոխանցմամբ, հաղորդել է DPA գործակալությունը՝ նշելով, որ Պիստորիուսը մտադիր է տեղում ծանոթանալ իրավիճակին և Ուկրաինայի ղեկավարության հետ քննարկել նոր ռազմական օգնության տրամադրումը։

«Մենք ամեն ինչ անում ենք Ուկրաինային աջակցելու համար, որպեսզի նա կարողանա պաշտպանվել և գտնվի այնպիսի դիրքում, որ Ռուսաստանը պատրաստ լինի լուրջ բանակցությունների», - ասել է Պիստորիուսը։

«Իհարկե, մենք կխոսենք այն մասին, թե ինչպիսին կլինի Գերմանիայի և այլ եվրոպացիների աջակցությունն ապագայում, ինչ կարող ենք անել, օրինակ, արդյունաբերական համագործակցության ոլորտում, ինչպես նաև այլ օգնության հարցում», - ասել է նա։

Գերմանիան Միացյալ Նահանգներից հետո Ուկրաինային զենքի երկրորդ խոշորագույն մատակարարն է։ Ուկրաինայում հակամարտության սկզբից ի վեր Գերմանիան Կիևին տրամադրել էր ավելի քան 40 միլիարդ եվրո արժողությամբ տարբեր տեսակի օգնություն։ Ռուսական կողմը բազմիցս նշել է, որ Կիևի ռեժիմին զենք մատակարարելը միայն հանգեցնում է հակամարտության երկարաձգմանը։