ԱՄՆ-ն մտավախություն ունի, որ Իսրայելի ՀՕՊ համակարգերը չեն կարողանա դիմակայել Իրանի պատասխան հարվածներին

ԱՄՆ-ն մտավախություն ունի, որ եթե Իսրայելը հարվածի Իրանի միջուկային օբյեկտներին, ապա Իսրայելի ՀՕՊ համակարգերը չեն կարողանա դիմակայել Իրանի հակահարվածներին: Այս մասին հաղորդում է Axios-ը՝ հղում անելով աղբյուրներին։
«ԱՄՆ-ն մտահոգված է, որ Իսրայելի ՀՕՊ համակարգերը չեն կարողանա դիմակայել Իրանի կողմից հարյուրավոր հրթիռներով հարվածներին»,- գրում է պորտալը։ Ըստ այդմ, ԱՄՆ-ի նախագահի՝ Մերձավոր Արևելքի հարցերով հատուկ ներկայացուցիչ Սթիվ Վիթքոֆն ամերիկացի սենատորների խմբի հետ ճեպազրույցի ժամանակ ասել է, որ եթե Իսրայելը հարվածի իրանական միջուկային օբյեկտներին, ապա հետագա իրանական պատասխանը կարող է հանգեցնել Իսրայելում զանգվածային զոհերի և լուրջ նյութական վնասների։ Պորտալը մեջբերել է ԱՄՆ-ի հետախուզության գնահատականները, համաձայն որոնց՝ Իրանն ունի 2000 հրթիռ, որոնք կարող են կրել 900 կիլոգրամ կամ ավելի քաշ ունեցող լիցք, և Իսրայելը դրանցից շատերի հասանելիության սահմաններում է։
Ամերիկացի պաշտոնյան Axios-ին ասել է, որ 2024 թվականի հոկտեմբերին Իսրայելի վրա վերջին հրթիռային հարձակումից ի վեր Իրանն զգալիորեն մեծացրել է բալիստիկ հրթիռների արտադրությունը՝ ամսական մոտ 50-ի հասցնելով։ Նույն աղբյուրը պորտալին ասել է, որ Իրանի նպատակն է, ենթադրաբար, արտադրել ավելի շատ բալիստիկ հրթիռներ, քան Իսրայելի ունեցած կալանիչ հրթիռների քանակն է։