Նեթանյահուն իրանցիներին կոչ է արել ապստամբել սեփական իշխանությունների դեմ

Իսրայելի վարչապետ Բենիամին Նեթանյահուն տեսաուղերձ է հղել Իրանի ժողովրդին՝ կոչ անելով նրանց ապստամբել Իսլամական Հանրապետության իշխանությունների դեմ։

«Իսլամական ռեժիմը, որը ձեզ ճնշել է գրեթե 50 տարի, սպառնում է ոչնչացնել մեր երկիրը՝ Իսրայել պետությունը։ Իսրայելի գործողության նպատակն է վերացնել իսլամական ռեժիմի միջուկային և հրթիռային սպառնալիքը։ Մեր նպատակին հասնելու ուղղությամբ շարժվելով՝ մենք նաև մաքրում ենք ձեր ճանապարհը դեպի ազատություն», - ասել է նա։

Նեթանյահուի խոսքով՝ Իսրայելի կողմից Իրանին հարվածներից հետո Իսլամական Հանրապետության իշխանություններն «ավելի թույլ են, քան երբևէ»։

«Սա ձեր հնարավորությունն է ոտքի կանգնելու և ձեր ձայնը լսելի դարձնելու», - նշել է Իսրայելի վարչապետը։ «Ժամանակն է, որ իրանցի ժողովուրդը միավորվի իր դրոշի և պատմական ժառանգության շուրջ՝ ճնշողների չար ռեժիմից պաշտպանելով ազատությունը», - հավելել է նա։