Դանիայում կանանց կզորակոչեն բանակ

Դանիայի իշխանությունները որոշել են կանանց զորակոչել բանակ պարտադիր զինվորական ծառայության: Այս մասին հաղորդում է Associated Press-ը:

Նշվում է, որ փոփոխությունները հաստատվել են ՆԱՏՕ-ի երկրներում աճող ռազմական ներդրումների և ռուս-ուկրաինական հակամարտության պատճառով առաջացած միջազգային լարվածության ֆոնին: Դանիայի խորհրդարանի կողմից 2023 թվականի հունիսին ընդունված օրենքի համաձայն՝ 2025 թվականի հուլիսի 1-ից հետո 18 տարեկանը լրացող դանիացի կանայք կընդգրկվեն զորակոչի վիճակահանության համակարգում՝ իրենց տղամարդ հայրենակիցների հետ հավասար հիմունքներով:

Դանիայի օրենսդրության համաձայն՝ կամավորներն են առաջինը գրանցվում զինվորական ծառայության, իսկ մնացածը որոշվում են վիճակահանությամբ:

Զորակոչիկները նաև կունենան 4-ից մինչև 11 ամիս երկարացված ծառայության ժամկետ: «Սկզբում զորակոչիկները կանցկացնեն հինգ ամիս հիմնական պատրաստություն, ապա վեց ամիս օպերատիվ ծառայություն՝ գումարած լրացուցիչ պատրաստություն», - նշում է թերթը:

Ավելի վաղ հայտնի էր դարձել, որ Դանիայի իշխանությունները որոշել են սկսել առողջական խնդիրներ ունեցող քաղաքացիների զորակոչել երկրի զինված ուժեր: Զինվորական ծառայության թարմացված պահանջները ներառում են զիջումներ շաքարախտի, թեթև ասթմայի, ալերգիայի որոշ ձևերի և ուշադրության դեֆիցիտի և հիպերակտիվության խանգարման վերաբերյալ։