«Նիկոլ Փաշինյանն ու Ալիևը կհանդիպեն Դուբայում»․ #MiddleEastEye

Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը կհանդիպեն Դուբայում հուլիսի վերջին։ Այդ մասին գրում է Middle East Eye պարբերականը։

«Թեև Հայաստանն ու Ադրբեջանը խաղաղության համաձայնագրի նախագծի շուրջ համաձայնության են եկել մարտին, Բաքուն դեռևս առաջ է քաշում մի քանի լրացուցիչ պայմաններ՝ նախքան համաձայնագիրը պաշտոնապես ստորագրելը:

Ադրբեջանը պահանջում է, որ Երևանը փոփոխություններ կատարի իր Սահմանադրության մեջ, բացառելով Ադրբեջանի տարածքի մասին հիշատակումները, դադարեցնի Հայաստանում Եվրոպական միության դիտորդական առաքելության գործունեությունը և լուծարի ԵԱՀԿ Մինսկի խումբը, որին Բաքուն վերջին երեք տասնամյակների ընթացքում մեղադրել է կողմնակալության մեջ», – գրում է Middle East Eye-ը:

Աղբյուրը հավելել է, որ ԱՄԷ-ն ցանկանում է հյուրընկալել բանակցությունները՝ երկու կովկասյան ժողովուրդների միջև հարաբերությունները բարելավելու իր ջանքերի շրջանակներում։

Ըստ պարբերականի՝ Դուբայում նախատեսված հանդիպումը դրական նշան է, որը ցույց է տալիս, որ երկու կողմերն էլ շարունակում են պատրաստակամ լինել համագործակցելու՝ չնայած շարունակվող տարաձայնություններին։

Փորձագետները նշում են, որ հաջորդ տարի կայանալիք ընտրությունների համատեքստում քիչ հավանական է, որ Փաշինյանը սահմանադրական հանրաքվե անցկացնի ընտրություններից առաջ։