«Թուրքիան աջակցում է ռուս-ադրբեջանական լարվածության կարգավորմանն ուղղված կառուցողական քայլերին». Էրդողան

Թուրքիան հույս ունի, որ Ադրբեջանի և Ռուսաստանի միջև լարված իրավիճակը կկարգավորվի և այն չի վնասի երկու երկրների միջև հարաբերություններին, հայտարարել է Թուրքիայի նախագահ Ռեջեփ Թայիփ Էրդողանը։

«Մեր գլխավոր ցանկությունն այն է, որ այս դժբախտ միջադեպերն անդառնալի վնաս չպատճառեն երկու երկրների միջև հարաբերություններին։ Տեղական անհամաձայնությունները կարող են լուծվել տվյալ իրավիճակի շրջանակներում, և դրա համար չափազանց կարևոր է հանգստություն պահպանել», - ընդգծել է նա։

Էրդողանի խոսքով՝ երկու երկրներն էլ «բավարար իմաստություն ունեն այս ճգնաժամը հաղթահարելու համար», Թուրքիան աջակցում է «կարգավորմանն ուղղված կառուցողական քայլերին», - նշել է նա։

«Կովկասն այլևս չի դիմանա նոր բախման», - կարծում է Թուրքիայի նախագահը։

Նա հավելել է, որ իրավիճակը քննարկել է Ադրբեջանի նախագահ Իլհամ Ալիևի հետ, ով «գործում է չափազանց զգույշ՝ չտրվելով սադրանքներին և չսադրելով հակամարտություն»։

Ռուս-ադրբեջանական հարաբերությունների սրումը պայմանավորված էր հունիսի վերջին Եկատերինբուրգում ադրբեջանական սփյուռքի անդամների ձերբակալությամբ, որին հետևել է Բաքվում «Sputnik Ադրբեջանի» մի քանի աշխատակիցների՝ ՌԴ քաղաքացիների ձերբակալությունը: