«Մենք չենք հանձնվի»․ Մերցը՝ Պուտինին

Գերմանիայի կանցլեր Ֆրիդրիխ Մերցը Հռոմում Ուկրաինայի վերակառուցման վերաբերյալ համաժողովում դիմել է ՌԴ և ԱՄՆ նախագահներ Վլադիմիր Պուտինին և Դոնալդ Թրամփին։ Իր ելույթի ավարտին Մերցը շնորհակալություն է հայտնել դաշնակիցներին Կիևին ցուցաբերած օգնության համար և պարզաբանել, որ Բեռլինը կշարունակի աջակցել Ուկրաինայի էներգետիկ համակարգի կայունացմանը և վերակառուցմանը։

Նա նաև նշել է, որ ունի երկու ուղերձ։

«Ես երկու ուղերձ ունեմ։ Մեկն ուղղված է Մոսկվային և Պուտինին։ Ուղերձը բավականին պարզ է՝ մենք չենք հանձնվի»,- ասել է նա։

Այնուհետև Մերցը դիմել է Վաշինգթոնին և ԱՄՆ նախագահին՝ կոչ անելով մնալ Եվրոպայի հետ դաշինքի մեջ։ «Մնացե՛ք մեզ հետ», - ասել է Մերցը։

Նրա խոսքով՝ եվրոպացիներն ու ամերիկացիները նույն ալիքի վրա են, ունեն նույն շահերը։

«Աշխարհում մենք ձգտում ենք կայուն քաղաքական կարգի։ Մենք՝ ամերիկացիներն ու եվրոպացիներս, միասին ենք։ Մնացե՛ք մեզ հետ այս կողմում և մեր ընդհանուր պատմության այս էջում», - ընդգծել է Գերմանիայի կանցլերը։