«Մոսկվան կցանկանար հասկանալ, թե ի՞նչ նկատի ունի Թրամփը»․ Լավրով

Մոսկվան կցանկանար հասկանալ, թե ի՞նչ նկատի ունի ԱՄՆ նախագահ Դոնալդ Թրամփը՝ ուկրաինական կարգավորման համար 50 օրվա մասին իր հայտարարությամբ։ Այս մասին ասել է Ռուսաստանի արտաքին գործերի նախարար Սերգեյ Լավրովը՝ հիշեցնելով, որ ԱՄՆ նախագահը նախկինում մի քանի անգամ տարբեր ժամկետներ էր նշել։

«Իհարկե, մենք ուզում ենք հասկանալ, թե ի՞նչ է թաքնված Թրամփի՝ 50 օրվա մասին հայտարարության հետևում։ Նախկինում դա 24 ժամ էր, եղել էր՝ 100 օր, մենք այդ ամենն անցել ենք, և իսկապես ուզում ենք հասկանալ, թե ի՞նչ մղում ունի Միացյալ Նահանգների նախագահը»,- ասել է ՌԴ ԱԳՆ ղեկավարը՝ ՇՀԿ-ի արտաքին գործերի նախարարների խորհրդի նիստից հետո։
«Ակնհայտ է, որ նա (Թրամփը) գտնվում է ԵՄ-ի և ՆԱՏՕ-ի ներկայիս ղեկավարության կողմից հսկայական, ես կասեի՝ անպարկեշտ ճնշման տակ, որը շարունակում է զենք մատակարարել Ուկրաինային»,- հավելել է Լավրովը։

Հիշեցնենք՝ Թրամփը սպառնացել է Ռուսաստանին 100 տոկոս մաքսատուրքերով, եթե 50 օրվա մեջ հակամարտության հարցում համաձայնություն չլինի։