«Դրուզների պաշտպանությունը մեր առաջնահերթությունն է»․ Ահմեդ ալ-Շարաա

Սիրիայի անցումային նախագահ Ահմեդ ալ-Շարաան հայտարարել է, որ դրուզ քաղաքացիների պաշտպանությունը և նրանց իրավունքների ապահովումը «մեր առաջնահերթությունն է»։

Դամասկոսի վրա չորեքշաբթի իրականացված իսրայելական ավիահարվածներից հետո իր առաջին հեռուստատեսային ելույթում, Շարաան նշել է. «Մենք նրանցից չենք, ովքեր վախենում են պատերազմից։ Մենք մեր կյանքը ապրել ենք մարտահրավերների դեմ կանգնելով և մեր ժողովրդին պաշտպանելով, բայց մենք Սիրիայի շահերը նախընտրել ենք քաոսից ու կործանումից»։

Պետության ղեկավարը նշել է, որ դրուզները սիրիացի ժողովրդի անբաժանելի մասն են կազմում։

Նրա խոսքով՝ նախորդ ռեժիմի անկումից ի վեր, Իսրայելը ձգտել է Սիրիայի տարածքը վերածել հակամարտությունների ասպարեզի և թուլացնել երկրի ներքին միասնությունը։

«Սիրիան օտարերկրյա դավադրությունների և արտաքին նկրտումների փորձադաշտ չէ։ Նոր Սիրիայի կառուցումը պահանջում է կենտրոնանալ երկրի շահերի վրա և չներքաշել այն քաոսի մեջ»,- նշել է Շարաան։