«Թրամփը կարող է հանդիպել Պուտինի և Ցզինպինի հետ Չինաստանում` Պուտինին տրված վերջնաժամկետի օրը». The Times

Չինաստանի նախագահ Սի Ցզինպինը կարող է եռակողմ հանդիպում կազմակերպել ԱՄՆ-ի նախագահ Դոնալդ Թրամփի և ՌԴ նախագահ Վլադիմիր Պուտինի հետ՝ Երկրորդ համաշխարհային պատերազմի ավարտը նշող տոնակատարությունների շրջանակներում, որը տեղի կունենա Պեկինում սեպտեմբերի 3-ին: Այս մասին հաղորդում է The Times-ը՝ նշելով, որ Պուտինն արդեն հաստատել է իր մասնակցությունը տոնական միջոցառմանը: Ընտրված ամսաթիվը գրեթե համընկնում է Կրեմլին ուղղված՝ Թրամփի վերջնագրի ավարտի հետ. ավելի վաղ նա Պուտինին 50 օր էր տվել Ուկրաինայում ռազմական գործողությունները դադարեցնելու համար:

Հրապարակման համաձայն, որոշ չինացի վերլուծաբաններ և հասարակական գործիչներ կոչ են անում սեպտեմբերի 3-ի շքերթն օգտագործել՝ որպես միջազգային դիվանագիտական ժեստի հնարավորություն: Հայտնի չինացի ազգայնական Ջին Կանրոնգն ասել է. «Ինչո՞ւ չհամընկեցնել Թրամփի այցն այս շքերթի հետ: Եթե նա գա և մասնակցի, դա հզոր դրական ազդանշան կլինի աշխարհի համար: Չինաստանի, Ռուսաստանի և Ամերիկայի առաջնորդները՝ միասին կանգնած. այս պատկերը կարող է խորհրդանշել խաղաղություն և կայունություն աշխարհում»:

Ճապոնական Kyodo գործակալությունը նույնպես ավելի վաղ հաղորդել էր Թրամփին Պեկին հրավիրելու մտադրության մասին: Սակայն The Times-ն ընդգծում է, որ չինական իշխանությունների կողմից այս տեղեկատվության պաշտոնական հաստատում դեռևս չի եղել։

Թայվանցի վերլուծաբան Վեն-Տի Սունը կարծում է, որ նման այցը ավելի շատ օգտակար կլինի Պուտինի և Սիի համար, քան անձամբ Թրամփի համար։ Նրա կարծիքով, խորհրդականները կարող են ԱՄՆ-ի նախագահին համոզել՝ չմասնակցել։