Իրանը և ՌԴ-ն համատեղ ծովային զորավարժություններ կանցկացնեն

Իրանի և Ռուսաստանի ռազմածովային ուժերը հաջորդ շաբաթ համատեղ զորավարժություններ կանցկացնեն Կասպից ծովում։
CASAREX 2025 անվամբ համատեղ ծովային փրկարարական զորավարժությունները կմեկնարկեն հուլիսի 21-ին և կտևեն երեք օր։
Այս մասին հայտնել է իրանական պետական Tasnim գործակալությունը։

Զորավարժությունները կանցկացվեն Իրանի ռազմածովային ուժերի հյուսիսային նավատորմի կողմից՝ «Միասին անվտանգ և պաշտպանված Կասպից ծովի համար» խորագրով։

Զորավարժություններին կմասնակցեն Իրանի ռազմածովային ուժերի, Իսլամական հեղափոխության պահապանների կորպուսի, Իրանի Իսլամական Հանրապետության իրավապահ մարմինների և Ռուսաստանի Դաշնության ռազմածովային ուժերի զինծառայողները։ Զորավարժություններին կմասնակցեն նաև Կասպից ծովի մի շարք ափամերձ պետություններից դիտորդներ։

Փրկարարական և օգնության զորավարժությունները կուղղվեն ծովային անվտանգության բարձրացմանը և Կասպից ծովի երկրների ռազմածովային ուժերի միջև համագործակցության ընդլայնմանը։