Ֆրանսիան անօդաչու թռչող սարքեր կհավաքի Ուկրաինայում

Ֆրանսիական ընկերությունները պատրաստ են անօդաչու թռչող սարքեր արտադրել Ուկրաինայում։ Այս մասին իր Telegram ալիքում հայտարարել է Ուկրաինայի նախագահ Վլադիմիր Զելենսկին Ֆրանսիայի արտաքին գործերի նախարար Ժան-Նոել Բարոյի հետ հանդիպումից հետո։

Նա ասել է, որ նրանք քննարկել են պաշտպանական օգնությունը, մասնավորապես՝ ՀՕՊ համակարգերի անհրաժեշտությունը, ուկրաինացի զինվորականների պատրաստումը և Rammstein ձևաչափով հանդիպումների արդյունքները։

«Մենք պատրաստ ենք ընդլայնել համատեղ պաշտպանական արտադրությունը։ Ֆրանսիական ընկերությունների կողմից որոշում կա Ուկրաինայում անօդաչու թռչող սարքերի արտադրություն սկսելու մասին, և սա շատ կարևոր է։ Մենք նաև խոսել ենք Ռուսաստանի դեմ պատժամիջոցների և Ուկրաինայի՝ ԵՄ-ին անդամակցության բանակցությունների մասին»,- գրել է Ուկրաինայի առաջնորդը։

Զելենսկին նաև շնորհակալություն է հայտնել Ֆրանսիային, նախագահ Էմանուել Մակրոնին և անձամբ Բարոյին երկրին աջակցելու համար։

Նախորդ օրը Ուկրաինայի նախագահը հանձնարարել էր Ուկրաինայի զինված ուժերի գերագույն հրամանատար Ալեքսանդր Սիրսկուն, երկրի պաշտպանության նախարար Դենիս Շմիգալին և Հանրապետության Ազգային անվտանգության և պաշտպանության խորհրդի քարտուղար Ռուստեմ Ումերովին ավելացնել անօդաչու թռչող սարքերի գնումը։