Գերմանիան հաստատել է Eurofighter կործանիչների արտահանումը Թուրքիա

Գերմանիայի կառավարությունը երկարատև վեճից հետո բացել է Eurofighter կործանիչների՝ Թուրքիա արտահանման ճանապարհը։ Գերմանիայի կառավարության խոսնակ Ստեֆան Կոռնելիուսը չորեքշաբթի օրը Բեռլինում հայտարարել է, որ Պաշտպանության նախարարությունը նամակ է ուղարկել Թուրքիայի կառավարությանը՝ «հաստատելով կործանիչների արտահանման թույլտվությունը»։

Այժմ, ըստ Կոռնելիուսի, Թուրքիայի կառավարությունը պետք է որոշի՝ պատվիրե՞լ ինքնաթիռները, թե՞ ոչ։

Թուրքիան նախատեսում է գնել 40 Eurofighter
Ավելի վաղ Մեծ Բրիտանիան և Թուրքիան ստորագրել էին այս մարտական ինքնաթիռների արտահանման վերաբերյալ փոխըմբռնման հուշագիր։ Դրա համաձայն՝ Անկարան մտադիր է գնել 40 Eurofighter, որոնք հավաքվում են Մեծ Բրիտանիայում։ Քանի որ Գերմանիան մասնակցում է այս համատեղ եվրոպական նախագծին, այն նույնպես պետք է համաձայնվի արտահանմանը։

Մեծ Բրիտանիայի պաշտպանության նախարար Ջոն Հիլին համաձայնագիրը անվանել է մեծ քայլ։ Եվ թուրքական բանակը դրանցով զինելը, նրա կարծիքով, «կամրապնդի ՆԱՏՕ-ի կոլեկտիվ պաշտպանությունը և խթան կհաղորդի երկու երկրների արդյունաբերական բազային»։
Գերմանիայում Թուրքիա զենքի մատակարարումների շուրջ վեճեր
ՆԱՏՕ-ի դաշնակից Թուրքիային զենքի մատակարարումները հակասություններ են առաջացնում Գերմանիայում՝ այդ երկրում մարդու իրավունքների իրավիճակի, ինչպես նաև Անկարայի՝ միջազգային ասպարեզում գործողությունների պատճառով։

2016 թվականին թուրքական զորքերի՝ Սիրիա մուտք գործելուց հետո Թուրքիա զենքի արտահանման թույլտվություններն զգալիորեն սահմանափակվեցին. հաջորդ տարիներին դրանց ծավալները կազմել են միայն փոքր գումարներ՝ չափված միլիոնավոր կամ տասնյակ միլիոնավոր եվրոներով։

Սակայն անցյալ տարի, արդեն «լուսացույցային կոալիցիայի» (սոցիալ-դեմոկրատներ, կանաչներ, ազատ դեմոկրատներ) կառավարության օրոք, ծավալները կրկին զգալիորեն աճեցին։ 2024 թվականի սեպտեմբերի վերջին «Կանաչների» կուսակցության քաղաքական գործիչ Ռոբերտ Հաբեքի գլխավորած էկոնոմիկայի նախարարությունը հայտարարեց, որ վերահաստատվել է Թուրքիա տորպեդոների, կառավարվող հրթիռների և սուզանավի բաղադրիչների մատակարարման խոշոր թույլտվությունը։