ՌԴ-ն և Ուկրաինան գերիներ են փոխանակել

Ուկրաինան և Ռուսաստանը գերիների փոխանակման ևս մեկ փուլ են իրականացրել։ Սա իններորդ փոխանակումն է՝ հունիսի սկզբին Ստամբուլում ձեռք բերված համաձայնագրերի շրջանակներում։ Ենթադրաբար, փոխանակումն իրականացվել է «250-ը՝ 250-ի դիմաց» բանաձևով։

Ուկրաինայի նախագահ Վլադիմիր Զելենսկին պարզաբանել է, որ ամռան ընթացքում գերությունից վերադարձվել է ավելի քան 1000 մարդ։

«Այսօր վերադարձող զինվորները պաշտպանել են Ուկրաինան ռազմաճակատի տարբեր ուղղություններով։ Նրանցից շատերը գերության մեջ են եղել ավելի քան երեք տարի։ Բոլորը կստանան անհրաժեշտ աջակցություն և բժշկական օգնություն», - գրել է Զելենսկին։

Փոխանակման մասին տեղեկատվությունը հաստատել է Ռուսաստանի ռազմական գերատեսչությունը։ Սակայն Կիևի և Մոսկվայի պաշտոնական գերատեսչությունները փոխանակվածների ճշգրիտ թիվը չեն նշել։