«Ոչ ոքից նեղացած չեմ․ վերջնական պատասխանը պատմությունը կտա»․ Լևոն Արոնյան

«Այս տարի հաջողություններ չէի ունեցել և շատ ուրախ եմ, որ այս մեծ մրցաշարում կարողացա հաղթել։ Ավելի մեծ մրցաշարերում հաղթելու հնարավորություն ունենալու եմ սեպտեմբերին և հոկտեմբեր-նոյեմբեր ամիսներին։ Հոկտեմբերի վերջից նոյեմբեր ընկած հատվածում Հնդկաստանում աշխարհի գավաթն է լինելու։ Դա հնարավորություն է՝ հավակնորդների մրցաշար ընկնելու։ Ես պատրաստվում եմ ու իմ օգնականների հետ մշակում ենք՝ ոնց պետք է աշխատել, որ բարձր պատրաստվածությամբ լինեմ»,- ABC media-ի հետ զրույցում ասել է գրոստմայստեր Լևոն Արոնյանը, ով հուլիսի 21-ին դարձավ «Մեծ սաղավարտի» մրցաշարի հաղթող։
Նա պատմեց, որ իր ամենակարևոր երկրպագուներից մեկը մայրն է, որ ամբողջ կյանքը որդու աճին նպաստելուն է ուղղել։ Ապա նաև կինն ու դուստրը, որ ոգեշնչման աղբյուր են․ «Նրանց համար եմ ամենաշատը խաղում նրանց ջանքը «փոխհատուցելու» ու ազգիս նվիրելու համար»,-ասել է Արոնյանը։

Լրագրողի դիտարկմանը, թե ԿԳՄՍ նախարարության փորձագետները 2021 թվականին ասել էին, թե ինքն այլևս «պոտենցիալ չունի», Լևոն Արոնյանն ասաց, որ ոչ մեկին ոչինչ ապացուցելու կարիք չունի, որովհետև ոչ ոքից նեղացած չէ․ «Ես զգում եմ միայն մեկ պարտականություն՝ իմ ազգի և երկրպագուների նկատմամբ։ Եթե ես մնայի Հայաստանում և շախմատ չխաղայի, ես չէի ուզենա նման հայրենակից լինել։ Իմ կարծիքով՝ մարդը պետք է ծառայի իր գործին և իմ՝ երկրից հեռանալը գործին ծառայել էր նշանակում։ Ես ուրախ եմ, որ շարունակում եմ իմ խաղը և ծառայում եմ հայությանը»,- ասել է Լևոն Արոնյանը։
Հարցին, թե Հայաստանը շատ կարևոր անուններ կորցրեց՝ Լևոն Արոնյան, Հենրիխ Մխիթարյնա, ո՞րն է խնդիրը, Արոնյանը պատասխանեց․ «Ես չեմ կարծում, որ կորել ենք մեր երկրից։ Ես էլ, Հենրիխ Մխիթարյանն էլ, ակտիվ կյանք ենք վարում դրսից Հայաստանի համար։ Պետությունն է որոշում իր քայլերը, մեզ համար այդ քայլերը սխալ են, իրենց համար՝ ճիշտ, բայց վերջնական պատասխանը պատմությունը կտա։ Ինձ համար կարևորն այն է, որ ես ու Հենրիխը շարունակում ենք պայքարել մեր ազգի համար և աջակցում ենք մեր երկրին։ Դա կանես դրսից, թե ներսից, հնարավորությունների հարց է»,- ասել է Արոնյանը։

Նրա խոսքով կարոտում է հայ շախմատիստներին ու նրանց հետ աշխատելը․ «Դրոշի փոփոխությունից հետո բաներ կան, որ կորցրել եմ։ Ինձ համար միշտ հաճելի է եղել մեր տղաների հետ խաղերի գնալը, ԱՄՆ-ի թիմի հետ խաղալը ևս հաճելի է, ուղղակի Նահանգների թիմն այնքան հզոր է, որ իմ ներկայությունը մեծ հաշվով այդքան բան չի փոխում, բայց Հայաստանի համար փոխում էր իմ ներկայությունը»,- ասել է Արոնյանը՝ նշելով, որ որպես շախմատիստ Հայաստան չի վերադառնա, բայց ավելի բարձր հարթակներում փորձելու է աշխարհին ծանոթացնել հայ ազգին։
Հարցազրույցն ամբողջությամբ՝ տեսանյութում։