Զելենսկին և Մակրոնը քննարկել են «եվրոպացիների մասնակցությամբ երկարաժամկետ խաղաղության շուրջ բանակցությունները»

Ուկրաինայի և Ֆրանսիայի նախագահներ Վլադիմիր Զելենսկին և Էմանուել Մակրոնը հեռախոսազրույց են ունեցել։ Զելենսկու փոխանցմամբ՝ նրանք, ի թիվս այլ հարցերի, քննարկել են Մոսկվայի և Կիևի միջև Ստամբուլում հուլիսի 23-ին տեղի ունեցած ուղիղ բանակցությունների երրորդ փուլի արդյունքները։

«Մենք սպասում ենք պատասխանի՝ մինչև օգոստոսի վերջ ամենաբարձր մակարդակով հանդիպում անցկացնելու մեր առաջարկության վերաբերյալ։ Եվրոպայի ներկայացուցիչները պետք է ներկա լինեն», - գրել է Զելենսկին Telegram-ում։

Բացի այդ, երկու նախագահները քննարկել են Ֆրանսիայի կողմից Ուկրաինային տրամադրվող ռազմական օգնությունը, մասնավորապես՝ SAMP/T և Crotale զենիթահրթիռային համակարգերի համար լրացուցիչ հրթիռների մատակարարումը, ինչպես նաև ուկրաինական ԱԹՍ-ների արտադրության ֆինանսավորումը։

«Ես հաստատել եմ Ֆրանսիայի աջակցությունը. մենք կշարունակենք ավելացնել Ուկրաինային տրամադրվող օգնությունը և ուժեղացնել ճնշումը Ռուսաստանի վրա։ Ռուսաստանը վերջապես պետք է համաձայնի հրադադարի, որը կբացի ճանապարհը եվրոպացիների մասնակցությամբ երկարատև խաղաղության շուրջ բանակցությունների համար», - գրել է Մակրոնը X-ում։