Իրանցի գիտնականները գաղտնի այցելել են Ռուսաստանի միջուկային կենտրոններ՝ տեխնոլոգիաներ փնտրելու համար

Financial Times-ը, հղում անելով իրանական և ռուսական կազմակերպությունների ներքին փաստաթղթերին, նամակներին և ճանապարհորդական փաստաթղթերին, հաղորդել է, որ միջուկային զենքի ծրագրին կապված իրանցի գիտնականները 2024 թվականին գաղտնի այցով Ռուսաստան են մեկնել՝ միջուկային լիցքերի փորձարկման համար օգտագործվող կրկնակի նշանակության տեխնոլոգիաներ ձեռք բերելու համար։

FT-ի տվյալներով՝ այցը տեղի է ունեցել ուղիղ մեկ տարի առաջ՝ 2024 թվականի օգոստոսի 4-ին։ Պատվիրակությունը գլխավորել է 43-ամյա իրանցի միջուկային ֆիզիկոս Ալի Քալվանդը, ով, ըստ արևմտյան պաշտոնյաների, աշխատում է Պաշտպանության նորարարությունների և հետազոտությունների կազմակերպությունում (SPND): Այս կառույցը, ըստ ԱՄՆ-ի, Իրանի միջուկային ռազմական ծրագրի անմիջական իրավահաջորդն է, որը գործել է մինչև 2004 թվականը։

Քալվանդին ուղեկցել են իրանական «DamavandTec» խորհրդատվական ընկերության աշխատակիցները, որը գտնվում է ԱՄՆ պատժամիջոցների տակ՝ SPND մատակարարմանը օգնելու համար, ինչպես նաև իրանական ռազմական հակահետախուզության ներկայացուցիչը։

Այցի ընթացքում Իրանի ներկայացուցիչները հետաքրքրվել են միջուկային մարտագլխիկների փորձարկման մեջ օգտագործվող կրկնակի նշանակության տեխնոլոգիաներով և միջնորդի միջոցով քննարկել են Ռուսաստանից որոշակի իզոտոպ ձեռք բերելու հնարավորությունը, որը կարող է զգալիորեն մեծացնել միջուկային լիցքերի հզորությունը։

Financial Times-ը նշում է, որ այցը կազմակերպվել է խիստ գաղտնիության մթնոլորտում և լայնորեն չի հրապարակվել։ Հետաքննության հիմքում ընկած նյութերը ենթադրում են, որ իրանական կողմը փորձում է արագացնել իր միջուկային մշակումները՝ օգտագործելով արտաքին կապերը և շրջանցելով գործող միջազգային սահմանափակումները։