«Պուտինը Փաշինյանին պատմել է Ուիթքոֆի հետ զրույցի արդյունքների և Թրամփի հետ սպասվող հանդիպման մասին»․ Կրեմլ

668

Երկուշաբթի, 11 օգոստոսի, 2025 թ., 15:22

Այսօր տեղի ունեցած հեռախոսազրույցի ընթացքում ՀՀ վարչապետ Նիկոլ Փաշինյանը Ռուսաստանի նախագահ Վլադիմիր Պուտինին տեղեկացրել է օգոստոսի 8-ին Վաշինգթոնում ԱՄՆ նախագահ Դոնալդ Թրամփի և Ադրբեջանի նախագահ Ալիևի հետ հանդիպման արդյունքների մասին։ Այս մասին հայտնել է Կրեմլի մամուլի ծառայությունը։

Նշվում է, որ զրույցը տեղի է ունեցել հայկական կողմի նախաձեռնությամբ։

Զրույցի ընթացքում անդրադարձ է կատարվել նաև ուկրաինական հակամարտությանը: «ՀՀ վարչապետը ողջունել է ուկրաինական ճգնաժամի խաղաղ կարգավորմանն ուղղված քայլերը»,- ասվում է հաղորդագրության մեջ։
Իր հերթին, ՌԴ նախագահը Նիկոլ Փաշինյանին պատմել է ԱՄՆ նախագահի հատուկ ներկայացուցիչ Սթիվ Ուիթքոֆի հետ զրույցի արդյունքների և Ալյասկայում ԱՄՆ նախագահ Դոնալդ Թրամփի հետ հանդիպման նախապատրաստման մասին։

Պուտինը հաստատել է Ռուսաստանի պատրաստակամությունը՝ նպաստելու հայ-ադրբեջանական հարաբերությունների համապարփակ կարգավորմանը։ «Հաստատվել է ռուսական կողմի պատրաստակամությունը՝ 2020-2022 թվականների եռակողմ համաձայնագրերին համապատասխան՝ նպաստել հայ-ադրբեջանական հարաբերությունների համապարփակ կարգավորմանը, այդ թվում՝ տարածաշրջանում տրանսպորտային հաղորդակցությունների ապաշրջափակմանը»,- ասվում է հայտարարության մեջ։