«ԱՄՆ-ՌԴ ցանկացած համաձայնագիր պետք է ներառի Ուկրաինան ու ԵՄ-ն»․ Կալլաս

ԵՄ դիվանագիտության ղեկավար Կայա Կալլասը ԵՄ արտաքին գործերի նախարարների հանդիպում է հրավիրել՝ հետագա քայլերը քննարկելու համար։ «ԱՄՆ-ն հնարավորություն ունի Ռուսաստանին ստիպելու լուրջ բանակցություններ վարել։ ԱՄՆ-ի և Ռուսաստանի միջև ցանկացած հնարավոր համաձայնագիր պետք է ներառի Ուկրաինան և ԵՄ-ն, քանի որ սա անվտանգության հարց է Ուկրաինայի և ամբողջ Եվրոպայի համար»,- ասել է Կալլասը։

«Միջազգային իրավունքը հստակ սահմանում է՝ բոլոր ժամանակավորապես օկուպացված տարածքները պատկանում են Ուկրաինային, և բանակցային կարգավորումը չպետք է ճանապարհ հարթի Ուկրաինայի, տրանսատլանտյան դաշինքի կամ Եվրոպայի դեմ հետագա ագրեսիայի համար»,- հավելել է Կալլասը։

ԵՄ դիվանագիտության ղեկավարը հայտարարել է, որ նախարարները կքննարկեն նաև Մերձավոր Արևելքում տիրող իրավիճակը։