Սուդանում փախստականների ճամբարի վրա հարձակման հետևանքով 40 մարդ է զոհվել

1405

Երեքշաբթի, 12 օգոստոսի, 2025 թ., 16:56

Առնվազն 40 մարդ է զոհվել Սուդանում՝ Հյուսիսային Դարֆուրի նահանգի մայրաքաղաք Էլ Ֆաշերի մերձակայքում գտնվող փախստականների ճամբարի վրա Արագ արձագանքման ուժերի գրոհի հետևանքով: Այս մասին հաղորդում է The Associated Press-ը։

Ըստ աղբյուրի՝ ճամբարում մոտավորապես 450 000 տեղահանվածներ են եղել։

Օրերս հայտնվել էին լուսանկարներ, որոնք ցույց էին տալիս, թե ինչպես է ԱԱՈւ-ն արգելափակում Էլ Ֆաշերից դուրս գալ փորձող մարդկանց ճանապարհը։

Էլ Ֆաշերը գտնվում է Սուդանի մայրաքաղաք Խարթումից ավելի քան 800 կմ դեպի հարավ-արևմուտք։ Քաղաքը Սուդանի զինված ուժերի վերջին խոշոր հենակետն է Դարֆուրում, արդեն շուրջ մեկ տարի ԱԱՈւ-ն փորձում է գրավել այն։

Սուդանում երկրի զինված ուժերի և ԱԱՈւ-ի միջև հակամարտությունն ընթանում է 2023թ. ապրիլի 15-ից։ Ավելի քան 14 միլիոն մարդ տեղահանվել է։ Ներկայում զինվորականները վերահսկում են Սուդանի հյուսիսը և արևելքը, այդ թվում՝ Խարթումը, իսկ ԱԱՈւ-ն՝ երկրի հարավը և գրեթե ողջ Դարֆուրի շրջանը։